5 жылда пластикалық ота жасаушылардың үстінен 39 шағым түскен
Денсаулық сақтау министрлігі Kazinform сауалына жолдаған жауапта пластикалық отадан кейін түсетін шағымның басым бөлігі маммопластика саласына тиесілі екенін мәлім етті.
Фото: Ақбөпе Әбдурасул
12:11 15.08.2024
«Косметология бағытында медициналық лицензиясы бар 1102 клиника жұмыс істейді. Оның ішінде 238-і пластикалық хирургия, 864-і дерматокосметология бағытында.
2019 жылдан бастап 2024 жылдың 1 тоқсанына дейін республика бойынша 34 медициналық (барлық жекеменшік) медициналық ұйымға және 5 медициналық емес ұйымға (сұлулық салондары) сапасыз пластикалық ота жасалғаны үшін 39 өтініш (өлім жағдайларынсыз) келіп түскен.
Оның 27-сі қаралып, тексеру жүргізілді. Бұл өтініштердің 18-і (67%) негізделген және ішінара негізделген», - деп жазады министрлік мамандары.
Осы шағымдардың негізінде жалпы сомасы 1 млн теңгеден сәл асатын айыппұлдар тағайындалған.
«39 өтініштің ішінен келесі қызметтерден кейінгі асқынуларға шағымдар түсті: маммопластика – 12, липосакция – 8, блефаропластика – 7, ерін пластикасы – 7, ринопластика – 3, бетке липофиллинг – 1, отопластика – 1. Өтініштерді қарау қорытындысы бойынша 1 009 125 теңгеге 8 әкімшілік хаттамасы толтырылды», - делінген жауапта.
Бұған дейін жазғанымыздай, шілде айында артық салмақтан арылу үшін ота жасатып қайтыс болған Алматы облысы тұрғынының ісі бойынша тағайындалған сот сараптамасының мерзімі ұзартылды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
