Жыл соңына дейін 300 мыңнан астам адам газбен қамтылады – Роман Скляр
Өткен жылы халықтың 60 пайызы газбен қамтылған. Ал биыл газ желілерін жаңғыртуға 194 млрд теңге бөлінді.
Фото: Виктор Федюнин/Kazinform
10:51 03.09.2024
Бұл туралы ҚР Премьер-Министрдің бірінші орынбасары Роман Скляр мәлім етті.
«2023 жылдың қорытындысы бойынша халықтың 60 пайызы газбен қамтылған. Жыл соңына дейін 300 мыңнан астам адам газбен қамтамасыз етіліп, 1 мың 700 шақырымнан астам газ желілері жаңғыртылатын болады, оған 194 млрд теңге бөлінді. «Бейнеу – Бозой – Шымкент 2», «Ақтөбе – Қостанай» және «Талдықорған – Үшарал» газ құбырларын салуға дайындық жұмыстары жүргізілуде», - деді Роман Скляр Үкімет отырысында.
Үкімет басшысының бірінші орынбасары қазір газ өңдеу зауыттары бойынша Қашағанда қуаты 1 және 2 жарым млрд текше метр болатын 2 зауыт салынып жатқанын айтты. Оларды 2026 және 2030 жылдары пайдалануға беру жоспарланған.
«Қарашығанақта қуаты 4 млрд текше метр болатын газ өндіру зауытын 2028 жылы іске қосу жоспарланып отыр. Бүгінде әлеуетті мердігер анықталды. Жаңаөзенде газ өңдеу зауыты бойынша жоба-сметалық құжаттарын әзірлеу басталды, дала жұмыстары жүргізілуде. 2027 жылы қолданысқа енгізу жоспарланып отыр», - дейді ол.
Дереккөз: kazinform
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
