Елордада есірткі зертханасын ұйымдастырған үш адам 10 жылдан астам мерзімге сотталды
Елордада есірткі зертханасы анықталды, деп хабарлайды Астана қалалық прокуратурасының баспасөз қызметі.
Фото: gov.kz
16:05 20.09.2024
Баспасөз қызметінің мәліметтеріне қарағанда, сотқа дейінгі тергеп-тексеру нәтижелері бойынша үш адам сотқа берілді.
Тергеу барысында мәлім болғанындай, сотталушы темір контейнерді жалға алған. Осыдан кейін ол қала сыртында құны 2 млн теңге болатын жер телімін сатып алып, контейнерді психотроптық заттарды шығаратын зертхана ретінде жабдықтап, орналастырған.
Кінәлі тұлға қылмыстық әрекетке екі сыбайласын тартқан. Тергеу барысында астыртын зертханадан алынған 24 кг астам психотроптық заттар жойылды.
Нәтижесінде сот елорданың үш тұрғынын аса ірі көлемде психотроптық заттардың аналогын сату мақсатында заңсыз дайындағаны және сақтағаны үшін кінәлі деп танып, 10 жылдан 11 жыл 3 айға дейінгі мерзімге бас бостандығынан айыру жазасына сотталды.
Үкім заңды күшіне енді.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
