Елордада тұрғын үйге жапсарлас салынған кафеде газ баллоны жарылды

«Бүгін (28 қыркүйек) газ баллонының жарылуы салдарынан Ақыртас көшесіндегі дәмхананың 6 қызметкері (барлығы ер адам) зардап шекті. Олар жедел медициналық жәрдем бригадасымен №1 көпбейінді қалалық ауруханаға жеткізіліп, бейінді мамандар қарады. Зардап шеккендердің төртеуінің әртүрлі дәрежеде беті мен денесін күйік шалып, шок алған, қалған екеуі түтіннен уланған», - деп хабарлады Қоғамдық денсаулық сақтау басқармасынан.

Ақпаратта айтылғандай, төрт пациент 1 КҚА-ның политравма, эндопротездеу және комбустиология орталығына жатқызылған. 

«Зардап шеккен екі адам 3 және 5% термиялық күйікпен келіп түсті. Тиісті ұсыныстар беріліп, амбулаториялық ем қабылдауға жіберілді», - дейді басқарманың баспасөз қызметінен.

Төтенше жағдайлар министрлігінің мәліметінше, қираған аумақ шамамен 60 шаршы метрді құрайды, өрт 15 шаршы метрді шарпыған. Тілсіз жау сөндірілді.

Дереккөз: Kazinform

Бізді Youtubе-та қараңыз! Бізді Facebook-та, Instagram-да, Telegram-да оқыңыз!