Өскеменде пәтер алуға көмектесеміз деп халықты алдаған алаяқтар 142 млн теңге пайда көрген
Өскемен қаласында мемлекеттік бағдарламамен пәтер сатып алуға көмектесеміз деп халықты алдаған алаяқтар 142 млн теңге пайда тапқан, деп жазады kazinform.
Фото: Александр Павский/Kazinform
10:32 02.10.2024
Қалалық ПБ Ертіс полиция бөліміне хабарласқан азамат алаяққа алданып қалғанын жеткізген. Оның айтуынша, 2022 жылдың қараша айында белгісіз біреулер пәтер алуға көмектесуге уәде беріп, 5 млн теңге алған. Бірақ сөздерінде тұрмай, хабар-ошасыз кеткен. Жедел-іздестіру шараларын жүргізу барысында полиция қызметкерлері күдіктілерді қолға түсірді. Олардың тағы 32 ұқсас қылмысқа қатысы бар екендігі анықталды.
«39 жастағы ер адам мен 41 жастағы әйел 2021 жылдан бастап тұрғындардың сеніміне кіріп, мемлекеттік бағдарлама бойынша пәтер сатып алуға көмектесеміз деп уәде беріп, ақшаны алғаннан кейін жоғалып кетіп отырған. Осының салдарынан жәбірленушілерге 142 млн теңге материалдық залал келтірілді», - делінген облыстық Полиция департаменті таратқан ақпаратта.
Қазіргі уақытта екеуі де қамауға алынды. Алаяқтық фактілері бойынша тергеу жүргізіліп жатыр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
