Алматы полициясы күшейтілген режимге көшті
Алматы полициясы қаладағы тәртіпті қамтамасыз ету бойынша шаралар қабылдады.
Фото: Солтан Жексенбеков/ Kazinform
14:10 02.10.2024
Алматы қалалық полиция департаментінің мәліметінше, мегаполисте күн сайын 2 мыңнан астам полиция қызметкері құқықтық тәртіпті қадағалайды.
Қоғамдық тәртіпті қамтамасыз ету, қылмыстардың, сондай-ақ басқа да заңсыз әрекеттердің дер кезінде алдын алу және жолын кесу мақсатында полиция қызметі күшейтілген режимге көшті.
Осыған орай Полиция департаментінің басшысы Арыстанғани Заппаров Алматы гарнизонына бірыңғай саптүзеу өткізді.
«Құрметті әріптестер, қаламыздағы қоғамдық қауіпсіздіктің жай-күйі сіздердің шұғыл әрекет етулеріңізге және нәтижелі жұмыстарыңызға тікелей байланысты. Бүгінгі таңда Алматы полициясының алдыңғы қатарлы материалдық-техникалық базасы бар және қылмысқа қарсы күресуге, құқықтық тәртіпті нығайтуға қажеттінің бәрімен қамтамасыз етілген. Сонымен қатар азаматтардың конституциялық құқықтары мен бостандықтарын қорғау ішкі істер органдарының бірінші кезектегі міндеті екенін әрқашан есте ұстаған жөн», – деді Арыстанғани Заппаров.
Сондай-ақ Алматы полициясының басшысы Ішкі істер министрлігінің қызмет көрсетудің сервистік моделіне көшу жөніндегі басым тұжырымдамаларының бірін жүзеге асыруға ерекше назар аударды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
