Содырлардың шахтаға жасаған шабуылынан 20 адам мерт болды
Пәкістанның оңтүстік-батысындағы Белуджистан провинциясында содырлардың жекеменшік көмір шахтасына жасаған шабуылынан 20 кенші қаза тауып, тағы 7-еуі жарақат алды, деп хабарлайды Reuters.
14:41 11.10.2024
Шабуыл таңертең ерте Ауғанстан мен Иранмен шектесетін минералға бай Белуджистан провинциясында болды.
«Бір топ адам таңғы сағатта Дуки ауданындағы «Джунаид» көмір компаниясының шахталарына ауыр қарумен шабуыл жасады», - деді полиция бөлімшесінің офицері Хумаюн Хан.
Reuters мәліметінше, содырлар шахта жұмысшыларын бір жерге жинап, кейін оларға оқ жаудырған. Шабуылшылар сондай-ақ тау-кен жабдықтарын өртеп жіберген.
Сарапшылардың пікірінше, бұл шабуыл – кейінгі апталардағы ең сорақысы және ол елде Шанхай ынтымақтастық ұйымы Еуразиялық тобының саммитін өткізуге бірнеше күн қалғанда жасалған.
Сонымен қатар жергілікті БАҚ-тың хабарлауынша, Исламабад экономикалық дағдарыстан шығуға тырысып жатқан Оңтүстік Азия еліндегі тау-кен өндіру келісімдерін зерттеген Сауд Арабиясының делегациясын қабылдауда.
Агенттік мәліметіне сәйкес, Белуджистан бірнеше ондаған жылдар бойы белудждік бүлікші топтарының мемлекетке қарсы соғысып жатқанына алаңдап келеді. Бірнеше шабуыл еңбек мигранттарына бағытталған, олардың көпшілігі, соның ішінде Ауғанстаннан келгендер шағын жекеменшік шахталарда жұмыс істеп жатыр.
Дереккөз: Kazinform
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
