Атырауда бассейнге батқан қыздың өліміне кінәлі құтқарушы сотталды
Атырауда «Мұнайшы» стадионындағы бассейнге 10 жасар қыз батып кеткен еді. Сот үкімімен жасөспірімді ересектер жүзетін залға жіберген құтқарушыға шартты жаза берілді.
15:16 27.11.2024
Бұл оқиға 14 шілдеде болған. Осы оқиғаға байланысты құтқарушыға қатысты қылмыстық іс қозғалды. Бұл іс Атырау қаласында №2 сотта қаралды.
Сот материалындағы дерекке қарағанда, «Мұнайшы» спорт кешеніндегі ЖШС-нің құтқарушысы өзіне жүктелген қауіпсіздік міндеттерін сақтамаған. Ол 10 жасар қызды бассейндегі ересектерге арналған жүзу залына өткізген.
«Онда жасөспірім бассейннің тереңдігі 5,5 метр болатын қауіпті бөлігінде жүзуге барған. Жүзе алмағандықтан қыз бала бассейнге батып кеткен. Құтқарушы тарапынан бұған дер кезінде назар аударылмаған. Шұғыл түрде көмек көрсету бойынша қауіпсіздік талаптары сақталмай, абайсызда жасөспірімнің өлiмiне әкеп соққан», - деп хабарлады соттың баспасөз қызметі.
Прокурор мен сотталушы арасында кінәні мойындау туралы процестік келісім жасақталды. Жәбірленуші тарап келісім шарттарымен келісті.
«Үкім қылмыстық жауаптылық пен жазаны жеңілдететін барлық мән-жайлар ескеріле отырып, келісімдік іс жүргізу тәртібінде шығарылды. Сотталушы ҚР Қылмыстық кодексінің 306-бабының 3-бөлігімен кінәлі деп танылып, оған 4 жыл мерзімге бас бостандығынан айыру жазасы тағайындалды. Аталған құжаттың 63-бабын қолданылып, сотталушыға жаза шартты түрде берілді», - мәлім етті соттан.
Сот үкімі заңды күшіне енген жоқ.
Дереккөз: Kazinform
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
