Оңтүстік Кореяда жолаушылар ұшағы апатқа ұшырады: 47 адам қаза тапты
Оңтүстік Кореяның Муан халықаралық әуежайында бортында 181 адамы бар жолаушылар ұшағы апатқа ұшырап, кем дегенде 47 адам қаза тауып, тағы көп адам жараланды. Билік өкілдерінің айтуынша, құтқару, тергеу жұмыстары жалғасуда.
Фото: Photo credit: Yonhap
09:05 29.12.2024
Жексенбі күні таңертең Оңтүстік Кореяның Муан халықаралық әуежайына қонған кезде бортында 181 адамы бар Jeju Air жолаушылар ұшағы апатқа ұшырап, кем дегенде 47 адам қаза тауып, көптеген адам жарақат алды. Зардап шеккендердің нақты санын анықтау жалғасуда.
Апат таңғы сағат 9:07-де орын алды, ұшақ ұшу-қону жолағынан сырғып шығып, қоршауға соқтығысты, кейін өрт пайда болды.
Билік ұшақтың артынан табылғандардың барлығының қаза болғанын растап, олардың саны артуы мүмкін екенін ескертті.
Йонхап ақпарат агенттігінің хабарлауынша, қазірге дейін 3 адам құтқарылған. Жолаушылардың көпшілігі Оңтүстік Корея азаматтары, сондай-ақ екі Таиланд азаматы болған.
Төтенше жағдайлар қызметі апат орнында іздестіру-құтқару жұмыстарын жүргізуде. Жергілікті ақпарат құралдарының хабарлауынша, апаттың себебі әлі белгісіз.
Президенттің міндетін атқарушы Чой Санг-мок барлық тиісті мекемелерге құтқару жұмыстарына назар аударуды және төтенше жағдайлар қызметінің қауіпсіздігін қамтамасыз етуді тапсырды.
Тергеушілер қайғылы оқиғаға не себеп болғанын анықтау үшін оқиға орнында жүр.
Дереккөз: kazinform
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
