Павлодар облысында 6 бағытта жолдар жабылып, полиция бекеттері қойылды
Қазіргі уақытта Астанаға апаратын автобанның Шідерті кенті маңында техниканың жиналуы байқалады. Шамамен 324 бірлік техника, 544 адам тұрып қалды.
Фото: Павлодар облысы төтенше жағдайлар департаменті
08:33 22.01.2025
Ауа райының нашарлауына байланысты Павлодарда 6 бағыт бойынша жолдар жабылды.
Жолдарға полиция бекеттері қойылып, автокөліктің барлық түрі жүруге шектелді.
- Ақмола және Қарағанды облыстарында ауа райының нашарлауына байланысты алты бағыт бойынша автожолдар жабық. Төтенше жағдайлар департаментімен арнайы жоғары өтімді техника, вахтовка, кезекші қызметкерлер қойылды. Жолға шыққан азаматтармен бірлескен түсіндіру жұмыстары жүргізіліп жатыр. Қазіргі уақытта Шідерті кентінде техниканың жиналуы байқалады. Шамамен 324 бірлік техника, 544 адам тұрып қалды,-деп хабарлады өңірлік төтенше жағдайлар департаментінен.
Шідерті кентінде тұрып қалған жолаушыларға Екібастұз қаласының әкімдігі және еріктілер ыстық тамақ ұйымдастырған. Кентте 3 жылыту пункті дайындалды.
Департаменттің мәліметінше, облыс бойынша барлығы 189 жылыту пункті бар.
Павлодар облысының төтенше жағдайлар департаменті азаматтарға автокөлікпен алыс сапарларға шығудан бас тартуды ұсынады.
Дереккөз: kazinform
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
