ҚР Ішкі істер министрлігі өрттің салдарынан болған қайғылы оқиғалардың статистикасын жариялады.

Вице-министр Юрий Ильиннің айтуынша, өткен жылы республика бойынша 14 567 өрт оқиғасы тіркелді. Ол бір жыл бұрын болған көрсеткіштен 6 процентке төмен. Бірақ өрт салдарынан қайтыс болған адамдардың саны 19 процентке өсіп, 434 адамға жетті. Бір жыл бұрын аталған көрсеткіш 352 адам болған.

«Бұдан бөлек, өткен жылы 412 адам жарақат алды. Жалпы, материалдық шығынның көлемі 3,5 миллиард теңгеден асты», - деді Ю.Ильин.

Ал Астана қаласында былтыр 699 өрт оқиғасы тіркелді. Сол кезде 10 адам қайтыс болды. Олардың ішінде бір бала бар. 2019 жылдың басынан бері елордада 69 өрт оқиғасы болды. Бүгін қайғылы оқиғада қайтыс болған бес бала - биылғы жылдың алғашқы құрбандары.

Айта кетейік, 4 ақпан күні түнде елорданың Сарыарқа ауданындағы Көктал-1 тұрғын алабында өрт шықты. Өртті сөндіру барысында 2006, 2008, 2014, 2016, 2018 жылы дүниеге келген 5 баланың денесі табылды. Ең кішісі небәрі үш айлық сәби еді. ҚР Ішкі істер министрлігі Астанадағы қайғылы оқиғаның мән-жайын түсіндірді. Тергеу материалдарына сәйкес, үйдің отағасын түнгі уақытта жұмыс берушісі шақырып алған. Вице-министр Юрий Ильин бес баланың өмірін жалмап кеткен өрттің алдын ала себебін де жариялады. Министрлік пеші бар әрбір үйге арнайы датчик орнатуға кеңес беріп отыр.

Дереккөз: ҚазАқпарат