Еліміздің бірқатар қаласында қатты аяз салдарынан оқушылар екінші ауысымда онлайн оқытуға ауыстырылды. Толығырақ Kazinform агенттігі тілшісінің материалында.

24 қаңтарда Астанада қатты аяз салдарынан 0-9 сынып оқушылары үшін екінші ауысымдағы сабақтар тоқтатылды. Олар қашықтан оқыту форматында оқитын болады. 10-11 сынып оқушылары штаттық режимде оқиды.

Қостанай облысы Ұзынкөл ауданының оқушылары да онлайн форматқа көшті. Аудандағы алты мектептің бастауыш сынып оқушылары екінші ауысымда «қашықтыққа» көшірілді. Орта және жоғары сыныптар дәстүрлі түрде оқиды.

Қарағанды облысында ауа температурасы -32-ге дейін төмендеуіне байланысты 0-11 сынып оқушылары үшін сабақтар тоқтатылды. Бүгінде өңірдегі барлық оқушы үйде оқиды.

Павлодарда мектепалды даярлық сыныптарының, 1-4 сынып оқушыларының екінші ауысымдағы сабақтары қашықтан оқыту форматына көшіріледі. Қалада ауа температурасы -25 градусқа жетті.

Екібастұзда да ауа райының қолайсыздығы байқалады. Салдарынан қалада 0-9 сынып оқушылары сабаққа үйлерінен қосылады. Қалған оқушылар штаттық режимде оқиды. 

Өскеменде екінші ауысымда оқитын барлық оқушы қашықтан оқу форматына көшірілді. Білім бөлімі хабарлағандай, барлық мектепте барлық сынып үшін сабақтар онлайн-форматқа ауыстырылды.

Дереккөз: kazinform