Биыл шомылу маусымында 164 адамның ажалы судан келген. Оның 51-і — балалар. Төтенше жағдайлар министрлігі келтірген үш айдағы мәлімет осындай. 

Ересектер рұқсат етілмеген жерге шомылады, ішімдік ішеді, ал бала-шаға қараусыз қалған. Министрлік нақты санды да келтіріпті. Мәселен, қайғылы жайттардың 90 пайызы рұқсат етілмеген жерде тіркелген. Ал қаза тапқандардың 40 пайызы мас болған. Сәйкесінше, мұндай ортада кішкентай балаларға тиісті назар аударылмай қалады. Бұл статистика жылда қайталанып, жағдай өзгермей тұр. Төтеншеліктер барынша абай болуға, өзен-көлге барғанда баладан көз жазып қалмауды тағы ескертеді.

Алексей Советов, ҚР ТЖМ Азаматтық қорғаныс және әскери бөлімдер комитеті төрағасының орынбасары:

— Өзен-көлге кәсіби құтқарушыларды қоя алмаймыз. Соның өзінде 722 белгіленген жаппай демалыс орны жабдықталды. Қосымша 158 мобильді құтқару бекеті қойылды. Жыл бойына кешенді профилактикалық іс-шара жалғасады. Күзгі-қысқы кезеңде де суда, мұзда қауіпсіздік ережесін сақтауға шақырамыз.