Алматыда өткен түні 52 жол апаты тіркеліп, 18 адам зардап шекті. Бұған төпелеп жауған қар аралас жаңбырдың кесірінен жолдың көктайғаққа айналуы себеп. Абырой болғанда адамдар дін аман.

Қалада қар қалыңдығы 17, таулы аймақта 35 сантиметрден асып кетті. Геонавигация картасында кептеліс ең жоғарғы 10 балл көрсетілгенімен, көшедегі жағдай одан бетер болған. Ал коммуналдық қызмет жолды қардан тазалап жатырмыз деп есеп беруде. Дегенмен полиция қызметкерлері жүргізушілерді жолда барынша абай болуға, ережені қатаң сақтауға шақырды.

Салтанат Әзірбек, Алматы қаласы ПД ресми өкілі

 — Алматы қаласында ауа райының күрт нашарлауына байланысты жолдағы жағдай күрделене түсті. Бұл жол-көлік оқиғасының болуына бірнеше факторлар себеп болып отыр. Кейбір көлік жүргізушілері жол жүру ережесін өрескел бұзады. Автокөлігін қыс мерзіміне дайындамаған.

Мамандар алдағы күндері еліміздің он шақты облысында қалың қар жауады деген болжам жасап отыр. Оңтүстегі төрт өңірден өзгесінің бәрінде қалың қар мен боран күтілуде. Кейбір республикалық жолдар уақытша жабылатынын арнайы қызметтер қазірден ескертіп отыр.