Мектептерде жаңа жылға күштеп ақша жинауға заңмен тыйым салынған. Оқу-ағарту министрі бүгін Үкімет отырысынан кейін ата-аналар қапеліне осы ережені тағы бір еске салды. Бұдан бөлек, жауапты министрлік келесі жылдан бастап оқушыларды дәруменге толы пайдалы ас-ауқатпен қамтимыз деп отыр. Мектеп мәзірі толық жаңартылып, енді оқушыларға ұн тағамдарының орнына ет пен көкөніс қосылған тіскебасар береді.

Жаңа оқу жылынан бастап мектеп оқушылары қантын өкіртіп салған ботқа мен бәліштің орнына, көкөніс жеп, дұрыс тамақтануға көшеді. Оқу-ағарту министрі Ғани Бейсембаев білім ордаларын жаңа тамақтану стандартына көшіруді ертерек қолға алмасақ, ауру жас талғамай бара жатыр дейді.

Десе де тек көкөніс беріп, балаларды ешкім аш құрсақ қалдырмайды. Ет пен сүт, құнарлы ауқатпен тек қала мектептері ғана емес, үш ауысымда оқитын шалғайдағы барлық білім ордалары қамтылады.

Олжас Бектенов, ҚР премьер-министрі:

— Бүгінгі таңда үш ауысымды оқытатын мектептердің 57 пайызы ауылда орналасқан. Көпшілігі Алматы және Түркістан облыстарында. Апатты мектептердің 76 пайызы ауылдағы елді мекендерде.

Былтыр ғана мектеп оқушыларына зілдей оқулықтың орнына «жаппай планшет ұстатамыз» деген министрлік өз ұсынысын ұмытқандай. Жауапты ведомствоның ендігі бас ауры — мектеп оқулықтарын түгелдей сүзгіден өткізіп, қателерді баспаның мойнына ілу. Министр Ғани Бейсембаевтың айтуынша, жаңа жылдан бастап оқулықтағы олқылықтарға енді мемлекет бюджетінен бір тиын да шығарылмайды.

Ғани Бейсембаев, ҚР Оқу-ағарту министрі:

— Оқулықтағы қателіктерді болдырмау бағытында баспалар жауапкершілігі заң тұрғысында күшейтілді. Бұдан былай оқулықты басқан баспа қателік жіберсе, онда ол өз қаржысы есебінен қателіктерді жөндеуге міндетті.

Жаңа жыл жақындаған сайын, әдетте мектеп чаттары да жанданып, ақша жинау төңірегінде гу-гу әңгіме көбейеді. Бірақ министр мектеп қабырғасында тиын-тебен жинауға министрлік қаулысы негізінде тыйым салынғанын тағы бір атап өтті. Бірақ ұстазын шағын сыйлықпен өз атынан қуантамын дегеннің олын ешкім қақпайды.

Ғани Бейсембаев, ҚР Оқу-ағарту министрі:

— Мектепте ешқандай шараға ақша жиналмауы тиіс. Бұған қатысты арнайы шығарылған министрлік қаулысы да бар. Мектеп бітіру кештеріне, жаңажылдық шыршаға қаражат жинап, мерекелік іс-шара өткізуге тыйым салынған. Дегенмен ата-аналар, оқушылар мұғалімдеріне сыйлық беріп қуантқысы келсе, оған регламент негізінде рұқсат етілген.