Алматыда-1 вокзалының маңындағы тұрғын үйлердің кіреберісіне  жаңа туған қызын тастап кеткен тасбауыр ана ұсталды. 47 жасында босанған әйел осы әрекеті үшін енді полицияға жауап бермек. Бірақ алдымен оның өзіне де медициналық көмек қажет.

Дүниеге келгеніне бір-екі сағат қана болған шақалақ бірден аурухана жатқызылды. Қазір дүние есігін жаңа ашқан қыз бала жансақтау бөлімінде аппаратпен тыныстап жатыр. Дәрігерлер бөбектің жағдайы ауыр екенін айтады. Босана сала, перзентінен безген анасы да ауруханаға жатқызылыпты.

Еске салсақ, кеше Түрксіб ауданының тұрғындары подъезде, жерде шырылдап жылап жатқан сәбиді байқаған. Олар бөбекті жылы жерге апарып, жедел жәрдем мен полиция шақыртқан болатын. 

Құрметбек Тоқтар, Алматы БШМККО директорының орынбасары:

— Жедел жәрдем бригадасы ауыр жағдайдағы сәбиді Балалар шұғыл медициналық көмек көрсету орталығына жеткізді. Қазір ол жансақтау бөлімшесінде өкпені жасанды желдету аппаратына қосылған. Барлық қажет медициналық көмек толық көрсетіліп жатыр.