Қосымша құн салығының көтерілуі инфляцияның өсуіне әкелуі мүмкін, бірақ бұл уақытша құбылыс болады деп отыр ұлттық экономика министрі. Айтуынша, инфляция үш пайыздан аспайды әрі жағдай бір жылда реттеледі. Осылай деген Серік Жұманғарин қосымша құн салығын 12-ден 16 пайызға дейін өсірудің бюджетке тиімді тұстарын жіпке тізді.

Серік Жұманғарин, ҚР Ұлттық экономика министрі:

 – Қосымша құн салығы мөлшерлемесін 16 пайызға дейін көтеру бюджеттің тұрақсыз мұнай кірістеріне тәуелділігін азайтады. Ұлттық қордың жинақтау функциясын күшейтеді. Маңызды мемлекеттік жобаларды қаржыландыруға мүмкіндік береді.

Үкімет «16-10-0» деген сараланған қосымша құн салығын ұсынып отыр. Яғни жеңілдігі жоқ бизнестегілер 16 пайыз төлеуге тиіс. Бұл ретте ұлттық экономика министрлігі салық салынатын төменгі шекті азайту қажет деп санайды. Яғни осыған дейін қосымша құн салығын қаржы айналымы 78 миллион теңгеден асатын кәсіпкерлер ғана төлеуге міндетті болды. Бірақ олардың көбі төлемнен жалтарып, ірі кәсіптерін бөліп тастап отырған дейді шенеуніктер. Сөйтіп қаржы айналымын 78 миллионға жеткізбей ұстайды екен.

Енді Үкімет қосымша құн салығын төлеудің төменгі шегін 15 миллион теңге дейін түсіруді көздейді. Ал 10 пайыз қосымша құн салығын денсаулық сақтау саласы үшін бекітпек. Нөл, яғни қосымша құн салығынан босату — ауыл шаруашылығы өнімдерін өндірушілерге жасалған жеңілдік. Ұлттық экономика министрлігі салықтың осындай сараланған түрін енгізу бюджетке түсімді жыл сайын 4-5 триллион теңгеге арттырады деп есептеп те қойыпты. 

Серік Жұманғарин, Ұлттық экономика министрі:

— Біз ауыл шаруашылығы өнімдерін өндірушілерді қосымша құн салығынан босатамыз. Қазір де шаруа қожалықтары бұл төлемді жүргізбейді. Осы жеңілдік сақталады. Ал, ауыл шаруашылығы өнімдерін өндіруші заңды тұлғалар белгіленген қосымша құн салығының 30 пайызын ғана төлеп келді. Бұдан былай олар да төлемнен түбегейлі босатылады. Бұл қадам Қазақстанда өндірілген картоп, қызанақ, пияз, қырыққабат сынды өнімдерді бәсекеге қабілетті етеді.