Картоп мәселесі шешімін таппай тұр. Дәлірек айтсақ, осы көкөніс түрінің бағасы. «Құны түспейтін не қылған өнім» деген сұрақ бүгін Үкімет жиынынан кейін ауыл шаруашылығы министріне қойылды. Айдарбек Сапаровтың пікірінше, бәріне кінәлі — сауда орындары.

«Қоймада картоп қоры жетеді, ешқандай тапшылық жоқ» - дейді министр. Бірақ оның бұл уәжі де көкөніс бағасына әсер ете алмай тұр. Қазір сауда орындарында картоптың келісі 360-450 теңге аралығында. Кейбір дүкендерде әлі де тапшы. Сапаров мұны алыпсатарлардың ашкөздігімен байланыстырады. Негізі тұрақтандыру қорларынан картоптың келісі 200 теңгеден шығады екен. Дүкенге жеткенше баға еселеніп шыға келеді. «Мұнымен енді күресеміз, реттейміз» - деді министр.

Өнімді шамадан тыс экспорттау да биыл осындай қымбатшылыққа әкеліпті. Былтыр 605 мың тонна өнім сыртқа шығарылған. Бұл он жылда болмаған экспорт екен. Мәселен, көрші Өзбекстанда 400 мың тонна картоп жетпей, біздің елден жеткізген.

Айдарбек Сапаров, ҚР Ауыл шаруашылығы министрі:

— Шынымен, картоп бағасы 450 теңгеге дейін жетті. Қазір Павлодар, Қарағанды облыстарында бағаны түсіру жұмыстары жүргізіліп жатыр. Бірақ фермерлер картопты сатқысы келмей отыр. Бізде картоп жеткілікті. Келісін 200 теңгеден өткізіп бере аламыз, қабылдай алса болды. Бұл жерде сауда нүктелеріне қатысты мәселе бар. Бұл мәселені қарастыратын боламыз.