Ақтөбе облысында кәріз құдығына құлап, газға уланып қайтыс болған жұмысшының отбасы еңбек инспекциясын сотқа берді. Қара жамылған отбасы тексерушілердің қортындысымен келіспей отыр. Себебі сараптама қорытындысында ащы суды татып алмайтын марқұмды «арақ ішкен» деп жазған екен.

Аслан Құрманов, марқұмның баласы:

— Жұмысшының қанында дейді. Сараптама қорытындысында 0,49 метил спирті табылды дейді. Менің әкемде 0,49 пайыз, ал қасындағы адамда 0,46 пайыз дейді. Әкем 1999 жылдан бері, 25 жыл болды ғой, ішпеген адам. 1999 жылы қойып кеткен. Біз оған қарсы жаздық. Ішпеген адамның қанынан қалайша спирт табылып тұр? Зәрінде жоқ, қанында шығып тұр. Іпшейтін адамда қайдағы спирт?! Біз соған келісе алмаймыз.

Еске салсақ, қайғылы оқиға жарты жыл бұрын Ембі кентінде болған. Коммуналдық мекеменің бес жұмысшысы кәріз құбырындағы ақауды жөндемекші болады. Құдыққа алдымен кірген екі адам бірден газға уланып, сол бойда қаза тапқан. Соңынан құдыққа түскен тағы екі жұмысшы ауруханадан бір-ақ шықты. Тексерушілер бұл оқиғаға жетпіс пайыз — жұмыс беруші, отыз пайыз — жұмысшының кінәсі бар деген қорытыңды шығарған. Бірақ мұнымен келіспеген марқұмның отбасы еңбек инспекциясымен соттасып жатыр.

Марқұм болған әкесінің жұмысқа арақ ішіп бармақ түгілі, ащы суды татып алмайтынын айтады. Ал еңбек инспекциясындағылар жұмыс кезіндегі адам өліміне қатысты тексеру жүргізуге тағы да арнайы комиссия құрдық деп отыр.

Талғат Искарин, Ақтөбе облысы еңбек инспекциясы департаменті басшысының міндетін атқарушы: 

— Комиссия құрылды. Комиссия қорытындысы бойынша жұмысшының да, жұмыс берушінің де кінәсі болды. Екі жақтың кінәсі бойынша баға берді. Ол енді тергеп-тексеру бойынша хаттамалар, түсініктемелер бүкіл Еңбек кодексінің талаптарын, ережелері бойынша тергеу-тексеру жүргізілді. Бүгінде сот жүріп жатыр. Мен әрі қарай баға бере алмаймын.