Баладай аңғал мінезді Ғалия химиялық тазалау орнында жұмыс істейді. Ол бақытты болуды армандап жүреді. Бірде Ғалия құрбысы Сабинамен бірге бір көріпкелге барады, көріпкел карта ашып, Ғалияның жақын күндері «ақбоз атты ханзадасын» кездестіретінін, бірақ соған бола біраз әуре-сарсаңға түсетінін болжап береді. Ғалия әуре-сарсаңға салатын адам өзінің сыныптасы Жомарт екенін ол кезде білмеген де еді. Арам ниетті Жомарт химиялық тазалаудағы бір тонды ұнатып қалып, Ғалияның көмегімен соны иемденіп кетпек болады. Ол Ғалияның асты-үстіне түсіп, мейрамханаға шақырады. Ғалия құрбысының сөзін тыңдап, мейрамханаға бір клиентінің тонын киіп барады. Кейін өзі бұған қатты өкінеді. Жомарт тонды мейрамханадан соң ұрлап әкетеді. Есі шыққан Ғалия әбден асып-сасып, бастығына не айтарын білмейді... Абырой болғанда, бастығы Едіге бұл жағдайға түсіністікпен қарап, бәрін шешуге көмектеседі. Сөйтсе, оның көзі көптен бері қол астындағы қызметкері Ғалияға түсіп жүр екен. Артынша Едіге Ғалияға үйленуге ұсыныс жасап, қыздың арманы күтпеген жерден орындалады.