Әлеуметтік медициналық сақтандыру қоры төрағасының орынбасары Индира Саркенова медициналық ұйымдарға жүргізілген тексерулердің қорытындысын айтты.

ӘМСҚ Жоғары аудиторлық палатаның ұйғарымы және Денсаулық сақтау министрлігінің тапсырмасы бойынша сатып алу рәсімін бастамай тұрып медициналық ұйымдарға жоспардан тыс тексеру жүргізген. 

"1 394 мемлекеттік және жеке меншік медициналық ұйымның жұмысы тексерілді. Солардың ішінде 237 мекеменің жұмысынан бірқатар заң бұзу фактілері анықталды. 75 медициналық ұйымда медициналық көмек пен өндірістік база лицензиясы дұрыс рәсімделмеген. 38 мекемеде рұқсат құжаттары болмаған. Бір өндірістік базаға бірнеше медициналық ұйым тіркеудің 48 жағдайы белгілі болды", - деді ол.

Тағы 32 ұйымда медицина қызметкерлерінің тиісті сертификаттары болмаған.

"119 медициналық ұйымда қажетті төсектің жеткіліксіздігі, медициналық техниканың ақпараттық жүйелерде көрсетілген сандармен сәйкеспеуі сияқты кемшіліктер табылды", - деді Индира Саркенов Мәжілісте.

Анықталған заң бұзу фактілері бойынша тұрақсыздық төлемі тағайындалып, айыппұлдар жазылған.

Сондай-ақ өрескел заңсыздықтарға жол берген медициналық ұйымдармен келісімшарттарды үзу мәселесі қаралып жатқаны айтылды.

ӘМСҚ өкілі 2025 жылдан бастап медициналық ұйымдардың науқас қабылдау көрсеткіштер жыл сайын өзектендіріліп отыратынын атап өтті. Бұл шара іс жүзінде көрсетілген қызмет пен құжаттардағы көрсеткіштердің бір-біріне сәйкестігін тексеру үшін жоспарланып отыр.

Дереккөз: Kazinform