Орал қаласында «Алый парус» ЖШС қызмет ететін барлық бағыттар бойынша автобустар жүргізушілері таңмен жұмысқа шығудан бас тартты.

Жүргізушілер еңбек демалысына уақытылы шығу мүмкіндігінің жоқтығы, сондай-ақ медициналық сақтандыруға, зейнетақы қорына қаржының дер кезінде аударылмауы салдарынан туындайтын қиындықтарды алға тартты.

Қала әкімдігінен алынған мәліметке қарағанда, таңғы рейс сағат 06.00-де басталса, кешкісін 21.00-де аяқталуы тиіс.

«Алый парус» ЖШС шаһардағы №3, №3к, №14, №17, №35, №38, №51, сондай-ақ қала маңындағы №55, №56 және №77 бағыт бойынша қызмет етеді.

Қалыптасқан мәселені шешу үшін сағат 09.00-де оқиға орнына қала әкімі Мұрат Байменов пен осы салаға жетекшілік ететін орынбасары Азамат Халелов келді.

Кәсіпорын басшылығымен бірге аталған бағыттар бойынша қатынайтын автобустар жүргізушілерімен түсіндіру жұмыстары жүргізілді. Қажетті шаралар алынғаннан кейін сағат 11.00-де мәселе шешіліп, автобустар тиісті бағыттарға оралды.

- Бұл бағыттарда 40 автобус қатынайды. Өткен жылдың 11 айында «Алый парус» ЖШС 898 млн теңге субсидияға өтінім берді. Соның ішінде 545 млн теңге төленді, бұл – сұралған қаржының 60 пайызы. Жүргізушілердің орташа айлық жалақысы – 390 мың теңге. Кәсіпорында 85 адам еңбек етеді, - деп хабарлады ведомстводан.

Дереккөз: kazinform