Ақтөбе облыстық дене шынықтыру және спорт басқармасының басшысы қызметіне Мейрамбек Махамбетов тағайындалды. Ол осы қызметке екінші рет келіп тұр.

ҚР Мемлекеттік қызмет істері агенттігі, Туризм және спорт министрлігінің келісімімен Мейрамбек Махамбетов қызметке келді. Ол 1989 жылы Ақтөбе қаласында дүниеге келген. Л. Н. Гумилев атындағы Еуразия ұлттық университетін «Аймақтану», 2014 жылы «Көкше» академиясын «Дене шынықтыру және спорт» мамандықтары бойынша тәмамдаған. Еңбек жолын 2011 жылы ҚР Туризм және спорт министрлігінің спорт бойынша Комитетінің референті болып бастаған. 

— 2011-2014 жылдары ҚР Туризм және спорт министрлігінің Спорт комитетінің құқықтық қамтамасыз ету және әкімшілендіру басқармасының сарапшысы, ҚР Спорт және дене шынықтыру істері агенттігінің дене шынықтыру департаментінің бұқаралық спортты дамыту басқармасының сарапшысы және бас сарапшысы болып жұмыс істеген. 2014-2018 жылдары ҚР Мәдениет және спорт министрлігінің Спорт және дене шынықтыру істері комитетінің бұқаралық және олимпиадалық емес спорт түрлерін дамыту басқармасының бас сарапшысы, әкімшілік және кадр жұмысы басқармасының басшысы, қысқы спорт түрлері басқармасының басшысы болып қызмет еткен, — деп хабарлады Ақтөбе облысы әкімінің баспасөз қызметі.

Ал 2018-2020 жылдары Ақтөбе облысының дене шынықтыру және спорт, Ақтөбе облысының жастар саясаты мәселелері басқармаларын басқарды. 2020-2024 жылдары Мәдениет және спорт министрлігі Спорт және дене шынықтыру істері комитетінің Ұлттық спорт түрлері және спорттағы мүмкіндіктері шектеулі адамдармен жұмыс жөніндегі басқармасының басшысы, Дене мүмкіндіктері шектеулі адамдарға арналған спорттық даярлау орталығының директоры, Қазақстанның кәсіби футбол лигасының атқарушы директоры қызметтерін атқарды. Сонымен бірге 2024 жылдың қаңтар айынан бастап республикалық сурдо футбол және футзал федерациясының президенті қызметін атқарып келді.