Атом электр станциясы жоспардағыдан ертерек пайдалануға берілуі мүмкін. Құрылысты жүргізетін тарапқа жұмысты жеделдету мәселесін қойып жатырмыз дейді энергетика министрі. Негізі жоспар бойынша 2035 жылы іске қосылатын болған.

Дегенмен консорциум құрамы әлі нақыталанбапты. Мұнымен ведомствоаралық комиссия айналысып жатыр. Үкімет мұнымен ғана емес, екінші АЭС-пен тезірек айналысуы тиіс. Бүгінгі кеңейтілген отырыста Президент бірінші атом электр станциясының құрылысын жеделдетіп, екіншін салынатын орынды анықтауды тапсырды. Ол үшін тағы референдум өткізудің қажеті жоқ. Заңға сәйкес, бұл АЭС Үкімет шешімімен салынады дейді Алмасадам Сәтқалиев. Екінші АЭС салынатын орын энергия тапшылығы көбірек өңірлерде, жан-жақты сараптамадан кейін белгілі болмақ. Ал біріншісі Алматы облысында салынады деп жоспарланған.

Алмасадам Сәтқалиев, ҚР Энергетика министрі:

— Аталған потенциалды толық жүзеге асыру үшін бірнеше АЭС салуымыз керек. Бүгін біз екінші атом электр станциясы құрылысы үшін қажет алаңды анықтау жайында тапсырма алдық. Әрине, нысан салынатын орынды өңірдегі электр желілері шоғырлану жағдайына, энергия таратудағы мүмкіндігіне қарай таңдаймыз.