АҚШ астанасында USAID ұйымының штаб-пәтері жабылды. Агенттіктің тақтайшасы алынып, жұмысын түбегейлі тоқтатқан. Американың Мемлекеттік басқару тиімділігі департаментінің жаңа басшысы, белгілі кәсіпкер Илон Масктың USAID–ті жабу туралы шешімін президент Трамп та мақұлдапты.

Қазір агенттіктің құпия ақпараттар сақталған компьютерлік жүйесі бақылауға алынған. Бұған дейін Маск аталған ұйымды биологиялық қару әзірлеуді қаржыландырды деп айыптаған еді. Оның ішінде миллиондаған адамның өмірін қиған COVID-19 қоздырғыштары да бар көрінеді. Маск, тіпті USAID-ты "қылмыстық ұйым" деп атады. Мұның алдында Дональд Трамп та USAID-ты "радикалдар тобы басқаратынын" мәлімдеген болатын.

Жалпы, халықаралық көмек қорын қаржыландыруды Трамп әкімшілігі өткен аптада тоқтатып, мыңдаған қызметкері жұмыстан босатылған. Халықаралық даму агенттігі, яғни USAID — АҚШ-тың халықаралық қаржылай көмегін тарататын агенттік. Әлемнің 100-ден аса елінде, соның ішінде Қазақстанда өкілдіктері бар ұйымның 50 миллиард доллардан аса бюджеті болған.